بالكلمات السابقة لخص النجم العالمي عمر الشريف الحالة التي يمر بها الان ..
وقال النجم الكبير في تصريح خاص لبوابة الشباب " من ساعة ما انفصلت عن فاتن حمامة وأنا معنديش بيت، حياتي كلها في الفنادق، معنديش غرفة نوم ولا مكان ينسيني التعب ومفيش حاجة تسليني غير التلفزيون اللي بكرهه ولكن معنديش غيره " ..
وأكد الشريف أنه لا يتابع أي برامج في التلفزيون ويكتفي بمتابعة الأفلام لأنه لا يملك ترف النزول والذهاب إلى السينما .. وقال إنه اختار الاقامة في أحد الفنادق المطلة على النيل لحبه الشديد له وأضاف " أشعر في النيل برائحة القاهرة وعلشان كده في بعض الأوقات أنزل بالليل وأتمشى على كوبري قصر النيل علشان اشم رائحة هواء القاهرة " ..
عمر الشريف قال ان الناس لا يتعرفون عليه بسهولة ..وأضاف " انا عجزت وشكلي إتغير والناس مابقتش تعرفني لما امشي بليل لوحدي، ولما حد بيعرفني بيلم الناس عليه وبقول لهم أنا عاوز أشم هوا براحتي فيتركوني في حالي ..لكن بصراحة مابقتش أشم هواء نظيفاً ، فقط دخان وعوادم وأخبط في الناس، القاهرة بقت صعبة قوي لكني بحبها "
وأشار الممثل الكبير إلي أنه لا يترك الفندق في الصباح أبدا لأن الوضع بالنسبة له يكون غير مريح " الناس مابتسيبنيش في حالي وأكون مش طايق نفسي ..وعلشان كده تحركاتي في مصر قليلة جدا" .. لكن رغم تحركاته القليلة كما يقول ، إلا أنه يعرف كل ما يدور في مصر، ويقول " أعرف كل حاجة أحسن منكم لأني أسأل الناس، أنا ماعنديش عربية وكل مشاويري تكون بالتاكسي، أكلم سواق التاكسي وأسألة عن حاله وأولاده، ولما أقابل غلابة في الشارع أسألهم عن أحوالهم، أحب اطمئن على الناس ، وأغلب الناس أصبحوا غلابة وعندهم مشاكل , كل واحد عنده هم مالوش آخر وكل ده من الغلا ء ، احنا عددنا بقى كبير قوي ولازم يحصل لنا كده " .
تحدث عمر الشريف أيضا عن أرتفاع أسعار الخضراوات وقال " الناس بتشتكي ان الأكل بقى غالي، السبب في كده إن الفلاحين هربوا من القرى عشان يشتغلوا قال إيه في المصانع .. وكانت النتيجة إن الأراضي الزراعية تفرقت ولا حصلنا دولة صناعية ولا فضلنا دولة زراعية ، حاجة كده على السلم، احنا طول عمرنا دولة بتزرع وتأكل العالم، دلوقتي مش لاقيين نأكل حتى نفسنا !" ..
في النهاية .. قال إنه يشعر بالملل من الحديث عن الماضي .. ولا يرى إن عنده أي كلام يقوله .
ليست هناك تعليقات:
إرسال تعليق